चालू घडामोडी सराव पेपर – 07 ऑगस्ट 2020

राष्ट्रपती राम नाथ कोविंद यांनी मनोज सिन्हा यांची जम्मू व काश्मीरचे नायब राज्यपाल म्हणून नियुक्ती केली आहे. तत्पूर्वी जी. सी. मुर्मू यांनी नायब राज्यपाल पदाचा राजीनामा दिला. तो राष्ट्रपतींनी स्विकारला आहे.

अजय त्यागी यांना 1 सप्टेंबर 2020 पासून भारतीय रोखे व विनिमय मंडळाच्या (SEBI) अध्यक्षपदी पुनर्नियुक्त करण्यात आले आहे. ही मुदतवाढ 18 महिन्यांसाठी दिली गेली आहे.

हुरुन रिसर्च या जागतिक संस्थेनी 2020 या वर्षासाठी वार्षिक हुरुन ग्लोबल युनिकॉर्न लिस्ट प्रसिद्ध केली आहे. त्यामध्ये प्रथम क्रमांक 233 युनिकॉर्न स्टार्टअप उद्योगांसह संयुक्त राज्ये अमेरिका देशाने पटकविला. द्वितीय क्रमांकावर 227 युनिकॉर्नसह चीन, तृतीय क्रमांकावर ब्रिटन तर चौथ्या क्रमांकावर 21 युनिकॉर्नसह भारत आहे.

शांती क्षेत्रात नोबेल पुरस्कार विजेता जॉन ह्यूम यांचे निधन झाले. ते उत्तर आयर्लंडमधील एक प्रख्यात राजकारणी होते, ज्यांनी उत्तर आयर्लंडमधील राजकीय संघर्ष संपविण्यासाठी 1998 साली बेलफास्ट करारावर स्वाक्षरी करण्यामध्ये मुख्य भूमिका बजावली होती.

संरक्षण मंत्रालय, प्रशासकीय सुधारणा व सार्वजनिक तक्रार विभाग आणि भारतीय तंत्रज्ञान संस्था (IIT कानपूर) यांच्यात एका त्रिपक्षीय करारावर स्वाक्षरी करण्यात आल्या. या सामंजस्य करारानुसार, संरक्षण मंत्रालयाशी संबंधित संकेतस्थळ आधारित केंद्रीकृत सार्वजनिक तक्रार निवारण व देखरेख प्रणाली (CPGRAMS) वर प्राप्त झालेल्या लोक तक्रारींचे शोध आणि विश्लेषण करण्यासाठी IIT कानपूर कृत्रिम बुद्धिमत्ता (AI) आणि मशीन लर्निंग तंत्रज्ञानाचा वापर करणार आहे.

ब्रिटनची सरकार महात्मा गांधी यांच्या दीडशेव्या जयंतीनिमित्त स्मारक नाणी जाहीर करणार आहे. रॉयल मिंट या नाणी तयार करणाऱ्या सरकारी संस्थेकडून ही नाणी तयार करण्यात येणार. याचबरोबर महात्मा गांधी ब्रिटिश नाण्यावर कोरले जाणारे पहिले अ-श्वेत पुरुष असतील.

गुयाना देशाचे राष्ट्रपती डॉ. इरफान अली यांनी मार्क अँथनी फिलिप्स यांची देशाच्या पंतप्रधान पदावर नेमणूक केली आहे. ते माजी ब्रिगेडियर आहेत जे संरक्षण दलाचे प्रमुख होते.गुयाना हा दक्षिण अमेरिकेच्या ईशान्य किनाऱ्यावरील प्रजासत्ताक देश आहे. याच्या उत्तरेस आणि ईशान्येस अटलांटिक महासागर, पूर्वेस सुरिनाम, दक्षिणेस ब्राझील व पश्चिमेस ब्राझील व व्हेनेझुएला आहेत. जॉर्जटाउन ही राजधानी आहे. गुयानी डॉलर हे राष्ट्रीय चलन आहे.

अॅक्सिस बँकेनी कृत्रिम बुद्धिमत्तेवर चालणारा नामक सहाय्यक ग्राहकांसाठी तयार केला आहे. ग्राहकांच्या दररोज एक लाख विनंत्या आणि ग्राहकांचे प्रश्न सोडविण्याची क्षमता याच्यात आहे.

कॉमनवेल्थ ह्युमन राइट्स इनिशिएटिव्ह (CHRI) संस्थेनी ईरॅडिकेटिंग मॉडर्न स्लेव्हरी: अॅन अॅसेसमेंट ऑफ कॉमनवेल्थ गव्हर्नमेंट प्रोग्रेस या शीर्षकाचा एक अहवाल प्रसिद्ध केला आहे. यात 2030 सालापर्यंत आधुनिक गुलामगिरीच्या निर्मूलनासंबंधी SDG 8.7 ध्येय साध्य करण्यात राष्ट्रकुल देशांनी केलेल्या प्रगतीचे मूल्यांकन केले गेले आहे. अहवालानुसार, राष्ट्रकुल देशांपैकी एक तृतीयांश देशांमध्ये जबरदस्तीने विवाह हा गुन्हा ठरविण्यात आला आहे, तर 23 देशांनी बालकांच्या व्यवसायिक लैंगिक शोषणाला गुन्हा ठरविलेला नाही. कोणत्याही आशियाई देशाने पुरवठा साखळीत सक्तीच्या मजुरीविरूद्ध कायदे तयार केलेले नाहीत.

हरयाणाच्या सरकारने राज्यात परिवार पहचान पत्र (PPP) योजना लागू केली आहे, ज्यामार्फत राज्यातल्या 54 लक्ष कुटुंबांना एक विशिष्ट ओळखपत्र दिले जाणार आहे. प्रत्येक कुटुंबाला एक 8-अंकी क्रमांक दिला जाणार आहे.