चालू घडामोडी सराव पेपर -15 May 2021

नवी दिल्लीत 11 मे आणि 12 मे 2021 रोजी BRICS रोजगार कार्यकारी गटाची पहिली बैठक आभासी माध्यमाद्वारे पार पडली. या बैठकीचे अध्यक्षपद भारताचे कामगार व रोजगार सचिव श्री अपूर्व चंद्रा यांनी भूषवले. वर्ष 2021 साठी भारताने BRICS गटाचे अध्यक्षपद स्विकारले आहे.
BRICS (ब्राझील, रशिया, भारत, चीन आणि दक्षिण आफ्रिका) देशांमध्ये सामाजिक सुरक्षा कराराला प्रोत्साहन देणे, कामगारांसाठी बाजारपेठ निर्माण करणे, कामगार शक्तीत महिलांचा सहभाग वाढवणे, घड्याळी तासावर काम करणाऱ्या कामगारांना व्यासपीठ उपलब्ध करून देणे हे चर्चेतील प्रमुख मुद्दे होते.

पंतप्रधान नरेंद्र मोदी यांच्या अध्यक्षतेखालील केंद्रीय मंत्रिमंडळाने भारतीय सनदी लेखापाल संस्था (ICAI) आणि कतार वित्तीय केंद्र प्राधिकरण (QFCA) यांच्यामध्ये झालेल्या सामंजस्य कराराला मंजुरी दिली आहे. या सामंजस्य करारामुळे कतारमध्ये लेखांकन व्यवसाय आणि उद्यमशीलतेला बळकट करण्याच्या उद्देशाने एकत्रित काम करण्यासाठी संस्थांमधील सहकार्य वाढणार आहे.
भारतीय सनदी लेखापाल संस्था (ICAI) ही भारतीय संसदेने मंजूर केलेल्या सनदी लेखापाल कायदा,1949 अंतर्गत स्थापन करण्यात आलेली एक सांविधीक संस्था आहे. ICAI संस्थेचे मध्य पूर्वेत 6,000 हुन अधिक सदस्यांसह एक बळकट सदस्यता आहे. कतारमधील, दोहा येथे ICAIची एक सक्रिय शाखा आहे, या शाखेची स्थापना 1981 साली करण्यात आली होती. ICAIचे सदस्य कतारमध्ये विविध खाजगी आणि सार्वजनिक कंपन्यांमध्ये महत्त्वाच्या पदांवर आहेत तसेच लेखांकन व्यवसायासाठी पाठिंबा आणि विकासात सक्रियपणे गुंतलेले आहेत

24 फेब्रुवारी 2019 रोजी लागू करण्यात आलेल्या प्रधानमंत्री किसान सन्मान निधी (पीएम-किसान) योजनेच्या अंमलबजावणीवर केंद्रीय सरकारचे कृषी व शेतकरी कल्याण मंत्रालय देखरेख ठेवते. योजनेच्या अंतर्गत देशातील सर्व शेतकऱ्यांना वर्षाकाठी प्रत्येकी 6,000 रुपयांचे मानधन मिळते.
पंतप्रधान नरेंद्र मोदी यांच्या हस्ते 14 मे 2021 रोजी दूर दृश्य प्रणालीच्या माध्यमातून प्रधानमंत्री किसान सन्मान निधी (पीएम किसान) योजनेचा आठवा हप्ता वितरीत करण्यात आला. एकाच वेळी या योजनेच्या 9,50,67,601 लाभार्थ्यांच्या खात्यात 2,06,67,75,66,000 रुपये निधी थेट जमा करण्यात आला

चीनने झिचांग उपग्रह प्रक्षेपण केंद्रावरून याओगान रिकॉनिसन्स उपग्रह प्रक्षेपित केला. हा एक गुप्तचर उपग्रह आहे, जो लष्करी अनुप्रयोगांमध्ये गुप्तमाहिती गोळा करून त्याचा वापर करण्यासाठी चीनने तयार केला.

जगभरातील क्रिकेट नियमावली तयार करणाऱ्या लंडन येथील मेरिलबोन क्रिकेट क्लबने (MCC) क्रिकेटमध्ये बांबूची बॅट वापरण्याविषयीच्या कल्पनेला सध्या नकार दिला आहे. क्रिकेटमध्ये संशोधन करणाऱ्या केंब्रिज विद्यापीठाच्या केंब्रिज विद्यापीठातील दर्शील शहा व बेन टिंकलर डेव्हिस या दोन विद्यार्थ्यांनी बांबूची बॅट वापरण्याविषयी एक कल्पना मांडली होती. क्रिकेटमध्ये अशा प्रकारची बॅट वापरल्यास हे नियमबाह्य ठरेल असे, MCCने स्पष्ट केले.
सध्या क्रिकेटमध्ये वापरण्यात येणाऱ्या बॅट इंग्लिश विलो किंवा कश्मिरी विलो या लाकडापासून बनवल्या जातात. MCCच्या नियम 5.3.2 नुसार बॅट ही लाकडी असावी. बांबू हे गवत असल्याने ते बॅट म्हणून वारण्यात येऊ शकत नाही

केंद्रीय सरकारच्या परवडण्याजोग्या आणि मध्यम उत्पन्न गृहनिर्माण (SWAMIH) योजनेसाठी विशेष खिडकी उपक्रमाने आपला पहिला निवासी प्रकल्प पूर्ण केला असून केंद्रीय वित्त आणि कंपनी कार्य मंत्री निर्मला सीतारामन यांनी 13 मे 2021 रोजी आभासी माध्यमातून घर खरेदीदारांना या घरांचा ताबा दिला. मुंबई उपनगरात स्थित रिवली पार्क हा निवासी प्रकल्प भारतातील पहिला गृहनिर्माण प्रकल्प आहे, ज्याला SWAMIH कोष अंतर्गत निधी मिळाला. रिवाली पार्क विंटरग्रीन्स ही या निधीची पहिली गुंतवणूक आहे; तसेच पूर्ण होणारा हा पहिला प्रकल्प आहे. 7 एकर जागेवर वसलेला आणि विविध आकारमानाची 708 घरे असलेला हा एक मोठा प्रकल्प आहे.
नोव्हेंबर 2019 मध्ये स्थापना झालेल्या SWAMIH गुंतवणूक कोष मार्फत आतापर्यंत 72 प्रकल्पांना अंतिम मंजुरी दिली असून या अंतर्गत 44,100 घरे बांधली जातील तर 132 प्रकल्पांना प्राथमिक मंजुरी मिळाली असून, यात आणखी 72,500 घरे बांधण्यात येतील. अशा प्रकारे, एकूण 1,16,600 घरे बांधण्याचे लक्ष्य या निधीचे आहे.

सागरी शेजारी देशांसोबत मैत्रीपूर्ण संबंध आणखी घट्ट करण्याच्या उद्देशाने भारतीय नौदलाने 11 मे आणि 12 मे 2021 रोजी गोव्याच्या नेव्हल वॉर कॉलेजच्यावतीने ‘गोवा सागरी परिसंवाद 2021 (GMS-21)’ हा कार्यक्रम आयोजित केला. कोविड-19 महामारीमुळे प्रथमच या कार्यक्रमाचे आभासी आयोजन करण्यात आले होते. भारत, बांग्लादेश, कोमोरोज, इंडोनेशिया, मादागास्कर, मलेशिया, मालदीव, मॉरिशस, म्यानमार, सेशेल्स, सिंगापूर, श्रीलंका आणि थायलंड या 13 हिंद महासागर क्षेतातील देशांचे नौदल प्रतिनिधी या कार्यक्रमात सहभागी झाले होते.
कार्यक्रमाची संकल्पना “सागरी सुरक्षा आणि उदयोन्मुख अपारंपारिक धोके – IOR नौदलांसाठी कृतीशील भूमिकेसाठीचे एक उदाहरण” या विषयावर केंद्रित असून ज्यात उदयोन्मुख सामान्य सागरी धोक्यांचा सामना करण्यासाठी हिंद महासागर प्रदेश (IOR) नौदलांसाठी सक्रिय भूमिका आणि सामायिक सागरी धोक्यांचा सामना करण्यासाठी क्षमता वाढवण्यावर यात भर देण्यात आला.

चेन्नईची भवानी देवी ही ऑलिंपिक खेळांमधील तलवारबाजी या क्रिडाप्रकारासाठी पात्र ठरलेली पहिली भारतीय व्यक्ती ठरली आहे. मार्च 2021 मध्ये झालेल्या बुडापेस्ट विश्वचषक स्पर्धेनंतर अॅडजस्टेड ऑफिशियल रँकिंग पद्धतीने तिने ऑलिंपिकमध्ये स्थान मिळवले

इस्त्रायल देशाकडे आयर्न डोम हवाई संरक्षण प्रणाली आहे. मोठ्या प्रमाणात क्षेपणास्त्राद्वारे होणारे हवाई हल्ले रोखण्यात ही संरक्षण प्रणाली सक्षम आहे

डॉ. शकुंतला हरकसिंग थिलस्टेड यांना वर्ल्ड फूड प्राइज फाऊंडशन या संस्थेच्यावतीने 2021 वर्ल्ड फूड प्राइज या पुरस्कार प्रदान करून सन्मानित करण्यात आले आहे.
डॉ. शकुंतला हरकसिंग थिलस्टेड या एक जागतिक पोषण तज्ञ आहेत. त्या भारतीय वंशाच्या असून मूळच्या त्रिनिदाद व टोबॅगो येथील जन्मलेल्या आहेत आणि डेन्मार्कची नागरिक आहे.