चालू घडामोडी सराव पेपर -02 जुलै 2020

क्रिडा मंत्री किरेन रिजिजू यांच्या हस्ते राष्ट्रीय उत्तेजक द्रव्य प्रतिबंधक समिती (NADA) याच्या नव्या NADA अॅपचे उद्घाटन करण्यात आले आहे. या अॅपद्वारे खेळाडूंना प्रतिबंधित उत्तेजक पदार्थांची यादी पुरविण्यात येणार, जेणेकरून ते त्यापासून दूर राहण्याचा प्रयत्न करतील. तसेच इतर अद्ययावत बातम्या/ सूचना/ निर्णय देखील पुरविणार.

मध्यप्रदेश सरकारने हमारा घर-हमारा विद्यालय योजना सादर केली आहे. महामारीच्या काळात अभ्यासात व्यत्यय आल्यामुळे विद्यार्थ्यांची शैक्षणिक नियमितता कायम ठेवण्यासाठीच्या उद्देशाने त्यांना आभासी माध्यमाने शिक्षण देण्यासाठी ही योजना आहे. 6 जुलै 2020 पासून ही योजना लागू केली जाणार आहे. योजनेतून तयार करण्यात आलेल्या व्यासपीठाच्या माध्यमातून विद्यार्थ्यांसाठी घरातच शाळेसारखे वातावरण तयार केले जाणार आहे, जसे की शाळेची घंटा, तासाची घंटा. रोज सकाळी 10 ते दुपारी 1 पर्यन्त वर्ग भरणार आहे.

30 जून या दिवशी आंतरराष्ट्रीय संसदवाद दिवस साजरा केला जातो. या दिवसाची स्थापना संयुक्त राष्ट्रसंघ महासभेमध्ये 2018 साली झाली. हा आंतर-संसदीय संघ (ITU) याचा स्थापना दिवस देखील आहे.

उत्तराखंड वनविभागाने भारतातले पहिले लिचेन उद्यान उभारण्यात आले आहे. हे उद्यान कुमाऊंच्या मुनसियारी क्षेत्रात 1.5 एकरात पसरलेले आहे. तिथे हिमालयामध्ये आढळणाऱ्या सुमारे 80 प्रजातींचे जतन करण्यात आले आहे.लिचेन ही पर्यावरणात होणाऱ्या बदलांना ठळकपणे दर्शविणारी वनस्पती/बुरशी आहे, जी वातावरणातल्या प्रदूषणाचे प्रमाण त्याचा रंग बदलून दर्शविते. तसेच ते अन्नपदार्थ, अत्तर, रंग आणि पारंपारिक औषधांमध्ये वापरले जातात. तज्ज्ञांच्या मते उत्तराखंडमध्ये लिचेनच्या 600 हून अधिक प्रजाती आहेत आणि त्यानंतर हिमाचल प्रदेश आणि जम्मू-काश्मीर या राज्यांमध्ये अनुक्रमे 503 आणि 386 प्रजाती आहेत.

लाझारुस चकवेरा हे मलावी देशाचे नवे राष्ट्रपती आहेत. तर सौलॉस चिलिमा हे उपराष्ट्रपती आहेत.मलावीचे प्रजासत्ताक हा दक्षिण पूर्व आफ्रिकेतील एक चिंचोळा भूपरिवेष्ठित देश आहे. लिलॉंग्वे ही मलावीची राजधानी आहे. क्वाचा हे देशाचे राष्ट्रीय चलन आहे.

माहिती तंत्रज्ञान मंत्रालयाने माहिती तंत्रज्ञान कायद्याच्या कलम 69(अ) अंतर्गत अधिकारांचा वापर करत जनतेद्वारे माहितीचा प्रवेश रोखण्यासाठी कार्यपद्धती आणि सुरक्षा नियम-2009आणि धोक्याचे आपत्कालीन स्वरूप लक्षात घेऊन 59 अॅपवर प्रतिबंध लादण्याचा निर्णय घेतला आहे. ते अॅप अशा कारवायांमध्ये सहभागी आहेत जे भारताचे सार्वभौमत्व आणि अखंडता, भारताचे संरक्षण, सुरक्षा आणि सार्वजनिक सुव्यवस्थेला हानिकारक आहेत.

अमेरिकेमध्ये मनोरंजन क्षेत्रातल्या ब्लॅक एंटरटेनमेंट टेलिव्हिजन या संस्थेचा BET 2020 या पुरस्कार वितरण समारंभ नुकताच पार पडला. या कार्यक्रमात पॉपस्टार बियॉन्स यांना तिच्या बेगुड फाउंडेशनमधील कार्यासाठी मानवतावाद पुरस्काराने सन्मानित करण्यात आले आहे.

दरवर्षी 30 जून या दिवशी जागतिक लघुग्रह दिन साजरा केला जातो. हा दिवस लघुग्रह धडकण्याच्या धोक्याबद्दल जनजागृती करण्यासाठी पाळला जातो.

30 जून 2020 रोजी चिनी संसदेमध्ये खास हाँगकाँगसाठी बनविण्यात आलेला राष्ट्रीय सुरक्षा कायदा मंजूर झाला. त्यामुळे संपूर्ण हाँगकाँग चीनच्या अधिकारात येण्याचा मार्ग मोकळा झाला आहे. चीनच्या नॅशनल पीपल्स काँग्रेसच्या स्थायी समितीमध्ये एकमताने हा राष्ट्रीय सुरक्षा कायदा मंजूर करण्यात आला.कधीकाळी ब्रिटिशांची वसाहत असलेले हाँगकाँग 23 वर्षांपूर्वी चीनकडे सोपवण्यात आले. हाँगकाँग चीनच्या नियंत्रणाखाली असले तरी तिथे वेगळे कायदे आहेत. हाँगकाँग हे जगातले महत्वाचे वित्तीय केंद्र आहे. हाँगकाँग 1997 सालापासून चीनच्या नियंत्रणाखाली आहे. त्यामुळे चीनचे सर्व कायदे हाँगकाँगमध्ये लागू होत नाहीत.

भारत बायोटेक इंडिया या कंपनीने विकसित केलेल्या लसीला भारत सरकारने मानवी चाचणीसाठी परवानगी दिली आहे. भारत बायोटेकने ‘कोव्हॅक्सिन’ ही कोरोनावरील लस तयार केली असून ड्रग कंट्रोलर जनरल ऑफ इंडिया (DCGI) यांनी परवानगी दिल्यानंतर आता जुलै महिन्यापासून या लसीवर मानवावरील वैद्यकीय चाचणीला सुरुवात होणार आहे. भारतीय वैद्यकीय संशोधन परिषद (ICMR) याच्या राष्ट्रीय विषाणूशास्त्र संस्थेच्या (NIV, पुणे) सहकार्याने ही लस तयार करण्यात आली.