चालू घडामोडी सराव पेपर -22 जून 2020

कोविड-18 विषाणूच्या संसर्गाच्या निदानासाठी आर.आर. अॅनिमल हेल्थकेअर लिमिटेड आणि गुवाहाटी वैद्यकिय महाविद्यालय व रुग्णालय या संस्थांच्या संयुक्त विद्यमाने गुवाहाटीच्या भारतीय तंत्रज्ञान संस्था (IIT) इथल्या संशोधकांनी स्वस्त अश्या तीन वेगवेगळ्या टेस्ट किट (म्हणजेच तपासणी संच) विकसित केल्या आहेत; त्यामध्ये व्हायरल ट्रान्सपोर्ट मीडिया (VTM) किट, RT-PCR किट आणि RNA आयसोलेशन किटचा समावेश आहे.

भारतीय तंत्रज्ञान संस्था, मंडी या संस्थेच्या संशोधकांनी हिमालयाच्या मध्यभागी आढळणाऱ्या औषधी वनस्पतींसाठी इंफ्यूजन तंत्रज्ञान विकसित केले. हे तंत्रज्ञान या प्रदेशात राहणाऱ्या अल्पभूधारक शेतकर्यांच्या उत्पन्नाचे शाश्वत साधन म्हणून उपयोगात आहे.

21-22 जून 2020 रोजी अमेरिका-भारत व्यवसाय परिषद या संस्थेनी इंडिया आयडिया समिट 2020 हा कार्यक्रम आयोजित केला. या बैठकीत भू-राजकीय या विषयावर चर्चा करण्यात आली.

अझरबैजानचे शाखरियार मामेद्यारोव्ह या बुद्धीबळपटूने वर्ल्ड स्टार्स शारजाह ऑनलाइन बुद्धीबळ अजिंक्यपद 2020 ही स्पर्धा जिंकली.

इनफेक्शीयस डिसीज डायग लॅब (I-LAB) ही भारततली पहिली फिरती कोविड-19 तपासणी प्रयोगशाळा तयार करण्यात आली आहे. ही प्रयोगशाळा आंध्रप्रदेश मेड-टेक झोन (AMTZ) यांच्या भागीदारीने जैवतंत्रज्ञान विभाग, विज्ञान व तंत्रज्ञान मंत्रालयाने तयार केली आहे.

रिलायन्स इंडस्ट्रीज लिमिटेड 11 लक्ष कोटी रुपयांच्या बाजार भांडवलाचा टप्पा गाठणारी पहिली कंपनी ठरली आहे.

केंद्रीय कोळसा, खाण आणि संसदीय कामकाज मंत्री प्रल्हाद जोशी यांच्या हस्ते दिनांक 15 जून 2020 रोजी खाण मंत्रालयाच्या अंतर्गत सत्यभामा (खनिज प्रगतीमध्ये आत्मनिर्भर भारतासाठी विज्ञान व तंत्रज्ञान योजना उर्फ SATYABHAMA) या संकेतस्थळ आधारित व्यासपीठाचा शुभारंभ करण्यात आला. राष्ट्रीय माहिती केंद्र (NIC) आणि खाण माहिती विभागाद्वारे व्यासपीठाची रचना, विकास आणि अंमलबजावणी करण्यात आली आहे. हे व्यासपीठ प्रकल्पांवर ऑनलाईन लक्ष ठेवण्यासोबतच वैज्ञानिक / संशोधकांकडून सादर केलेले संशोधनाचे प्रस्ताव आणि त्यासाठी दिलेला निधी/अनुदान वापरण्यास परवानगी देते. संशोधक यावर इलेक्ट्रॉनिक स्वरूपात प्रकल्पांचे प्रगती अहवाल आणि अंतिम तांत्रिक अहवालदेखील सादर करू शकतात.

फुटबॉलची महिला आशियाई चषक 2022 ही स्पर्धा भारतात आयोजित केली जाणार आहे. आशियाई फुटबॉल महासंघाच्या (AFC) महिला समितीने हा निर्णय घेतला.

डॉ. निराकार प्रधान यांची नॉर्थफिल्ड (मिनेसोटा) येथे असलेल्या प्रोफेशनल रिस्क मॅनेजर्स इंटरनॅशनल असोसिएशन (PRMIA) याचे प्रमुख म्हणून नेमणूक करण्यात आली आहे.

दरवर्षी 20 जून रोजी जागतिक निर्वासित दिन पाळला जातो. संयुक्त राष्ट्रसंघाच्या नेतृत्वात 2020 साली जागतिक निर्वासित दिन एव्हरी अॅक्शन काऊंट्स या संकल्पनेखाली साजरा करण्यात आला. निर्वासितांची दुर्दशा आणि त्यांच्या हक्कांकडे सरकारांचे लक्ष वेधण्यासाठी हा दिवस पाळला जातो.निर्वासितांच्या स्थितीशी संबंधित संयुक्त राष्ट्रसंघ करारनामा 1951 साली स्वीकारला आणि 22 एप्रिल 1954 रोजी अंमलात आले.