चालू घडामोडी सराव पेपर -28 जून 2020

दरवर्षी 26 जून या दिवशी संयुक्त राष्ट्रसंघाच्या नेतृत्वात अमली पदार्थाचे सेवन व अवैध तस्करी विरुद्ध आंतरराष्ट्रीय दिन जगभरात पाळला जातो. या दिनाला जागतिक अमली पदार्थ दिन म्हणूनही संबोधले जाते. हा दिवस अमली पदार्थ व्यसनमुक्त आंतरराष्ट्रीय समाज निर्माण करण्याबाबत सदस्य देशांद्वारे मान्य केलेल्या उद्दीष्टांची आठवण म्हणून पाळला जातो. यावर्षी म्हणजेच 2020 साली या दिनाची संकल्पना “बेटर नॉलेज फॉर बेटर केयर” ही आहे. या दिवशी अमली पदार्थांच्या सेवनामुळे होणार्या विघातक परिणामांविषयी जनजागृती केली जाते. संयुक्त राष्ट्रसंघ अमली पदार्थ व गुन्हेगारी कार्यालय (UNODC) आणि आयोग यादृष्टीने आंतरराष्ट्रीय पातळीवर काम करीत आहे.

भारतीय नौदलाच्या आघाडीच्या युद्ध जहाजांवरून पाणबुडी विरोधी गोळीबार करण्यास सक्षम अश्या मारीच नावाच्या प्रगत टॉरपेडो डेकॉय प्रणालीला दलात समाविष्ट केले आहे. ही स्वदेशी विकसित प्रणाली संरक्षण संशोधन व विकास संघटना (DRDO) याच्या प्रयोगशाळांमध्ये विकसित केली गेली आहे.

न्यूझीलंडची क्रिकेटपटू रॅशेल प्रिस्ट हिने खेळातून निवृत्ती घेण्याचा निर्णय घेतला आहे. त्यांनी 13 वर्ष क्रिकेट खेळले

बेंगळुरूचे केम्पेगौडा आंतरराष्ट्रीय विमानतळ स्वदेशी विकसित एव्हिएशन व्हेदर मॉनिटरिंग सिस्टम (AWMS) उपयोगात आणणारे देशातले पहिले आहे. बेंगळुरूच्या CSIR-नॅशनल एरोस्पेस लॅबोरेटरीज (NAL) या संस्थेनी नवीन AWMS तंत्रज्ञान विकसित केले.

त्रिपुराचे मुख्यमंत्री बिप्लब कुमार देब यांच्या हस्ते मुख्यमंत्री मातृ पुष्टी उपहार योजनेचा शुभारंभ करण्यात आला. राज्यातल्या सर्व गर्भवती आणि स्तनपान करणार्या महिलांसाठी ही योजना आहे. शेंगदाणे, सोयाबीन, मिश्र डाळी, गूळ आणि तूप यासारख्या खाद्यपदार्थांच्या वस्तू आणि किराणा पुरवठा करणारे पौष्टिक किट उपलब्ध करुन देऊन बालमृत्यू आणि कुपोषणाचा सामना करणे हे या योजनेचे उद्दीष्ट आहे. या योजनेचा राज्यातल्या 40,000 हून अधिक महिलांना लाभ होण्याची अपेक्षा आहे.

पंतप्रधान नरेंद्र मोदी यांनी 25 जून 2020 रोजी नवी दिल्ली येथून व्हिडिओ कॉन्फरन्सिंगच्या माध्यमातून आत्मनिर्भर उत्तर प्रदेश रोजगार अभियानचे उद्घाटन केले. या अभियानाच्या अंतर्गत स्थलांतरित कामगारांना रोजगाराच्या संधी उपलब्ध करून देण्यासह स्थानिक उद्योजकतेला प्रोत्साहन दिले जाणार. कोविड-19 महामारीच्या काळात उत्तरप्रदेशात 31 जिल्ह्यांमध्ये सुमारे तीस लक्ष स्थलांतरित मजूर परत आले आहेत. उद्योग आणि इतर संस्थांसह भागीदारी निर्माण करताना केंद्र सरकार आणि राज्य सरकारचे कार्यक्रम एकत्रपणे राबविले जातील.

आंतरराष्ट्रीय नाणेनिधी (IMF) या संस्थेनी “ए क्रिसिस लाइक नो अदर, अॅन अनसर्टन आउटलुक” या शीर्षकाखाली वर्ल्ड इकॉनॉमिक आउटलुक अहवालाची नवी आवृत्ती प्रसिद्ध केली आहे. या अहवालात, चालू आर्थिक वर्षात भारताचा वृद्धीदर उणे (-) 4.5 टक्के एवढा अंदाजित करण्यात आला आहे. तर जागतिक वृद्धीदर 5.4 टक्के वर्तविण्यात आला आहे.

पेट्रोलियम, नैसर्गिक वायू आणि पोलाद मंत्री धर्मेंद्र प्रधान यांनी ओडिशाचे मुख्यमंत्री नवीन पटनाईक यांच्यासमवेत 25 जून 2020 रोजी व्हिडिओ कॉन्फरन्सद्वारे पारादीप येथे उत्पादन वापर आणि विकास केंद्र(Product Application and Development Centre -PADC) यांचे उद्घाटन केले. इंडियन ऑईल कंपनीने हे केंद्र उभारले आहे. ग्राहक व नवीन गुंतवणूकदारांच्या गरजा पूर्ण करण्यासाठी तांत्रिक केंद्रात 50 अत्याधुनिक पॉलिमर टेस्टिंग आणि प्रोसेसिंग उपकरणे आहेत.

25-26 जून 2020 रोजी गुजरात राज्यात आभासीसंरक्षण परिषद 2020 आयोजित केली गेली. संरक्षण राज्यमंत्री श्रीपाद नाईक यांनी या कार्यक्रमाचे उद्घाटन केले. भारतीय उद्योग संघ (CII) गुजरात आणि भारतीय संरक्षण साहित्य उत्पादक संघटना (SIDM) यांच्या संयुक्त विद्यमाने या कार्यक्रमाचे आयोजन केले गेले.

25 जून 2020 रोजी नीती आयोगाने बिल अँड मिलिंडा गेट्स फाउंडेशन, सामाजिक व वर्तनात्मक परिवर्तन केंद्र (CSBC), अशोका विद्यापीठ, आरोग्य तसेच महिला व बाल कल्याण मंत्रालयाच्या सहकार्याने ;नेव्हीगेटिंग द न्यू नॉर्मल या अभियानाचा व संकेतस्थळाचा प्रारंभ केला. या संकेस्थळामध्ये टाळेबंदी उठविण्याच्या काळात मास्कचा वापर, सुरक्षित अंतर, हातांची स्वच्छता आणि सार्वजनिक ठिकाणी न थुंकणे या वर्तनविषयक चार बाबींवर लक्ष केंद्रित करण्यात आले आहे.