जे. पी. नड्डा भाजपचे नवे अध्यक्ष ,कोण आहेत जे. पी. नड्डा? जाणून घ्या

                    जे. पी. नड्डा हे भाजपचे नवे अध्यक्ष झाले आहेत. केंद्रीय गृहमंत्री अमित शहा यांनी पक्षाचे निवडणूक प्रभारी राधामोहन सिंह यांना नड्डांचे नाव अध्यक्षपदासाठी सुचवले होते. यामुळे नड्डा यांची अध्यक्षपदी बिनविरोध निवड झाली. अमित शहा यांनी गृहमंत्रीपदाची सूत्रे स्वीकारल्यानंतर नड्डा हे भाजपचे कार्यकारी अध्यक्ष झाले होते. लोप्रोफाइल असलेले आणि वादग्रस्त वक्त्यांपासून दूरच राहणारे अतिशय प्रभावी नेते, अशी नड्डांची ओळख आहे. पक्षावर नड्डांची पकड घट्ट आहे. पाहूया नड्डांची राजकीय कारकीर्द….

                    मूळचे हिमाचल प्रदेशचे आणि बिहारमध्ये जन्मलेले जे.पी. नड्डा यांचा भाजपच्या राष्ट्रीय राजकारणात मोठा वाटा आहे. पाटणामध्ये २ डिसेंबर १९६० ला त्यांचा जन्म झाला. तिथेच त्यांचे शालेय ते बीएपर्यंतचे शिक्षण झाले. इथेच ते राष्ट्रीय स्वयंसेवक संघाची संघटना अखिल भारतीय विद्यार्थी परीषदेत सहभागी झाले. यानंतर ते हिमाचल प्रदेशला गेले आण तिथे एलएलबीचे शिक्षण पूर्ण केले. मग १९९३मध्ये पहिल्यांदा ते हिमाचल प्रदेशमधून आमदार झाले.

                  हिमाचल विद्यापीठात शिक्षणादरम्यान ते विद्यार्थी संघटनेच्या राजकारणात आले. यानंतर त्यांनी भाजपमध्ये प्रवेश केला. ते तीन वेळा भाजपच्या तिकीटावर हिमाचल प्रदेशातून आमदार झाले. १९९३ ते ९८, १९९८ ते २००३ आणि २००७ ते २०१२ पर्यंत ते आमदार होते. तसंच १९९४ ते ९८ दरम्यान ते हिमाचल प्रदेश भाजपच्या विधिमंडळाचे नेते होते.

                             नड्डा यांना २००८ मध्ये महत्त्वाची जबाबदारी मिळाली होती. त्यावेळी ते प्रेम कुमार धूमल सरकारमध्ये आरोग्य मंत्री होते. धूमल यांच्या मंत्रिमंडळात समावेश झाल्यापासून नड्डा यांच्या राजकीय प्रगतीचा आलेख उंचावत गेला. आता ते पक्षातील प्रमुख वरिष्ठ नेत्यांपैकी एक आणि पक्षाचे अध्यक्ष झाले.

२०१० मध्ये राष्ट्रीय राजकारणात प्रवेश

                       हिमाचल प्रदेशात आमदार आणि मंत्री राहिलेले जे.पी. नड्डा यांनी २०१०मध्ये राष्ट्रीय राजकारणात प्रवेश केला. यावेळी नितीन गडकरी भाजपचे अध्यक्ष होते. गडकरींनी त्यावेळी नड्डांना सरचिटणीस पदाची जबाबदारी दिली होती. यानंतर त्यांनी कधी मागे वळून पाहिले नाही. पक्षात चर्चेत असलेल्या नड्डा यांना २०१४मध्ये नरेंद्र मोदी यांनी पंतप्रधान होताच कॅबिनेट मंत्री केले. तसंच अमित शहांना भाजप अध्यक्ष बनवले.

                      गेल्या वर्षी २०१९मध्ये पुन्हा नरेंद्र मोदीचे सरकार सत्तेत आले. यावेळी भाजपचे अध्यक्ष असलेले अमित शहा केंद्रीय गृहमंत्री झाले. पण पक्षाचं कामकाज कोण पाहणार? असा प्रश्न उपस्थित झाला. पुन्हा एकदा मोदींनी नड्डांवर पक्षाची जबाबदारी सोपवली. जुलै २०१९मध्ये आरोग्य मंत्रीपदाचा राजीनामा दिला आणि ते भाजपचे कार्यकारी अध्यक्ष झाले.

                       राजकीयदृष्ट्या अतिशय महत्त्वाचे असलेले राज्य म्हणजे उत्तर प्रदेश. २०१४ मध्ये उत्तर प्रदेशात भाजपला ७१ जागा मिळाल्या होत्या. २०१९च्या लोकसभा निवडणुकीत नड्डा यांच्यावर उत्तर प्रदेशची जबाबदारी होती. नड्डांनी पक्ष संघटना बळकट करत उत्तर प्रदेशात ६२ जागा जिंकून दिल्या. यामुळे मोदी सरकार पुन्हा सत्तेत आले आणि नड्डांचे पक्षातील वजन वाढले.

                            लोकसभा निवडणुकीत उत्तर प्रदेशात भाजपचा पराभव करण्यासाठी सपा आणि बसपाने युती केली होती. पण नड्डांच्या अचूक नियोजना आणि धोरणांमुळे सपा-बसपाच्या युतीचा दारुण पराभव झाला. निवडणुकी भाजपने ६२ जागा जिंकल्या. २०१४च्या तुलनेत ९ जागा कमी आल्या असल्यातरी भाजपसाठी हे मोठे यश होते. यामुळेच अमित शहा गृहमंत्री आणि नड्डा भाजपचे कार्यकरी अध्यक्ष झाले

✔ तुमचा एक ‘Share’ व ‘Like’ तुमच्या मित्रांना नोकरीची संधी देऊ शकतो !

ताज्या चालू घडामोडी जाणून घेण्यासाठी आमचे  टेलीग्राम चॅनल जॉईन  करा  Join Us on Telegram

ताज्या चालू घडामोडी जाणून घेण्यासाठी आमचे  WhatsApp चॅनल जॉईन  करा. Join Us on WhatsApp

अपडेट राहण्यासाठी लाईक करा आमचे फेसबुक पेज                                       Join Us on Facebook

आमची पोस्ट आवडल्यास कॉमेंट करून सांगा.